تفاصيل جديدة يرويها محمد عادل المتهم بذبح المصرية نيرة أشرف أثناء التحقيق معه بعد أن جاء تقرير الطب الشرعى المبدئي بأنه يتعاطى مخدر الاستروكس، إذ وقف المتهم فى حالة من الإعياء الشديدة نتيجة التعدى عليه بعد ارتكاب جريمته من المارة وزملاء نيرة. حيث أصيب بكدمات وجروح و كسر في ضلوع القفص الصدرى.
وقف المتهم أمام وكيل النيابة يصرخ بشدة «بحبها و بعشقها. أنا كنت حتى مقدرش أعاكس بنت من شدة خجلى و طول عمرى متفوق وبطلع الأول. حتى فى الكلية كنت بطلع الأول على دفعتى و ملتزم بالصلاة فى المسجد. لكن لما شفتها وقابلتها أول يوم فى الدراسة خطفت قلبى وقررت أصارحها بحبى، لكنها رفضتنى ورفضت حبى، واعتقدت إنها معندهاش ثقة فيا وإنها ظنت إنى غير صادق، ذهبت لأهلها أتقدم لخطبتها، لكنهم رفضونى لأنى طالب، وقالتلى أنت إزاى تتقدملى أصلا، أنت مش فى حساباتى ولا عمرى هاحبك ولا هرتبط بك، أنا ليا أحلام و طموحات غيرك».
وأضاف المتهم «قولت أستنى لما أخلص الكلية وأشتغل وأثبتلها حبى. لكن أصحابى اتريقو عليا وقالولى أنت هتفضل خام كدة ملكش علاقات وأى بنت تحب الولد اللي مقطع السمكة وديلها. وفى سنة ثانية شفتها بتتعاكس وكانت خناقة عليها. فأنا دخلت أهزأ الولد لكنه ضربنى قدامها. فأصحابى اتريقو عليا وقالولى يا خبتك اضربت قدامها. وقالولى إنى كدا مش هملى عنيها. فروحتلها وقولتها أنا بحبك وبفكر فيكى على طول. وقولتلها أنا مش هسيبك تتجوزى غيرى، ولو اتجوزتى غيرى هقتلك، فضحكت عليا هى وصحبتها وقالولى يا عم روح أنت متعرفش حتى تقتل فرخة».
“أنا عايز أتعدم من غير محاكمة”
و تابع المتهم «شعرت بإهانة شديدة ومن يومها فكرت أتغير وأشرب حشيش . علشان أكون راجل فى نظرها زى ما نصحونى أصحابى. وبدأت أطاردها في كل مكان وكنت ببعتلها رسايل علشان تخاف وترتبط بيا . لكنها كانت مصرة على موقفها. نيرة كانت من أرق البنات وكانت مؤدبة جدا والناس كلها بتحبها. فخوفت حد ياخدها منى فقررت أقتلها وكنت عايز أحتفظ براسها علشان أنا كنت بحب عيونها. أنا شربت مخدرات علشان أقدر أقتلها وأثبت للجميع إنى مش ضعيف. وبعدين أنا مش ندمان إنى قتلتها علشان ربنا عارف أنا بحبها أد إيه. فأكيد هيجمعنى بها، متحكمونيش وحاكموا اللى اتريقو عليا وأهانونى. أنا عايز أتعدم من غير محاكمة، بس ليا طلب بعد ما تعدمونى ادفنونى فى حضنها. أرجوكم».
فى سياق متصل، أثناء تمثيل المتهم للجريمة لم يستطع تمثيلها .وقال إنه لا يتذكر كيف فعلها. وكل ما يذكره هو أنه كان يريد وجهها فقط لذلك ذبحها .وكان يريد فصل رأسها حتى يحتفظ بها، ومثل جريمته بصعوبة.
و فى وقت سابق كان المستشار النائب العام أمر بإحالة المتهم محمد عادل إلى محكمة الجنايات. لمعاقبته فيما اتهم به من قتل الطالبة المجني عليها المصرية نيرة أشرف عمدا مع سبق الإصرار. حيث بيت النية وعقد العزم على قتلها، وتتبعها حتى ظفر بها أمام جامعة المنصورة، وباغتها بسكين طعنها به عدة طعنات، ونحرها قاصدا إزهاق روحها، وقد جاء قرار الإحالة بعد ثمان وأربعين ساعة من وقوع الحادث، كما تم التنسيق مع محكمة الاستئناف المختصة وتحددت أولى جلسات المحاكمة يوم الأحد القادم الموافق السادس و العشرين من الشهر الجاري.